利太做說客，叫法拉拍《衝上雲霄》第三集，冇留意娛樂新聞的利太，後來才知道對方同無綫已滿約，冇打算留底，即時發火。
探熱針
開金口 陳法拉離 TVB 事頭婆發威：佢拋我浪頭！
為無綫一洗頹風，大結局收視最高有 41點的《衝上雲霄 II》，劇中主角個個名利雙收，乘勝追擊，無綫雙管齊下，計劃開拍第三集及電影版。日前 TVB董事利孝和夫人（陸雁群）出席活動時，拉住劇中男女主角吳鎮宇及陳法拉，要二人答應埋位拍第三集。
對於陳法拉五月滿約後，無意留响無綫，利太火都嚟埋：「佢（陳法拉）拋我浪頭，我叫佢簽就要簽！」係威喎！
親自留人
勞動到八十八歲的利孝和夫人蒲頭，原因是親戚有化妝品旗艦店開幕，並請來大班明星撐場，當中包括近期熱爆的《衝上雲霄 II》男女主角吳鎮宇及陳法拉。
儀式進行前，一眾嘉賓被安排到 VIP區休息，利太一見吳鎮宇，主動拖着他雞啄唔斷，之後穿粉紅色大露背短裙的陳法拉到埗，老人家用齊雙手，拖着她猛讚《衝 II》好睇，即使她被圍插戲屎，利太仍大讚「做得好好」。
之後，利太還自爆已親口叫兩位主角幫無綫拍《衝 III》，更說自己晚晚在家追劇，是忠實 fans。
利：套劇好到不得了。我同佢哋講咗，要應承我拍第三集！
壹：陳法拉滿咗約唔簽無綫喎！
利：（權威地）梗係要簽啦，我叫佢簽就要即刻簽！
壹：講咗佢會簽俾鍾珍（陳慧琳經理人）。
利：亂噏啫，佢（陳法拉）拋我浪頭。
充滿信心的利太，之後跟同枱的阿太不停說：「我叫佢簽點敢唔簽呀，佢仲唔係拋我浪頭……？」十分好火。
利太斥陳法拉扭計唔續約是「拋浪頭」，陳法拉雖然唔再係親生女，但仍主動向利太解釋。 
《衝 II》成為收視劇霸，尤其是吳鎮宇、張智霖及陳法拉的三角關係，有批評指何年希性格與陳法拉本人極相似，同樣有公主病，但師奶觀眾相當受落。
即場補鑊
被前事頭婆鬧「拋浪頭」，陳法拉即時嚇窒。
「我幾時有話唔簽（無綫）呀？你唔好代我亂答喎！唔好倒我米呀大佬。好多謝利太咁賞識我，佢搵我一定拍㗎。」祝酒時，陳法拉更坐在利太身旁，不停解釋及耍冧，補晒飛。
至於吳鎮宇，一樣識做。
「利太嗌到一定要拍啦，由細做咖喱啡睇到我大，佢好人又冇架子，頭先都有同我講佢有追（劇集），估唔到佢咁得閒，有時間睇電視。」
正在內地拍電視劇的吳鎮宇，其實最快要明年才有期，但賣口乖氹老人家，就點都唔慳得。
當日吳鎮宇去到邊都被大班女人包圍影相，其中包括美容院老闆鄭明明（小圖），事後吳鎮宇自嘲拍了套「老人偶像劇」，才會俾女圍。 
為化妝店開幕剪綵，吳鎮宇與陳法拉各收六位數做壓軸嘉賓。身在內地拍劇的吳鎮宇有時間剪綵，卻抽不出時間出席在商場舉行、與演員一齊睇的大結局（下圖），他解釋九月份有三個賺錢工作一早傾好，難以分身。 
張智霖一劇翻身，廣告、登台、剪綵做不停，日前以千萬身價轉會蕭定一旗下公司。
一洗頹風
無綫收視大災難，多套重頭劇齊仆，好在有《衝上雲霄 II》挽回劣勢，大結局平均 38點，最高見 41點，大步𨂾過！
《金枝慾孽貳》
萬眾期待的重頭劇《金枝貳》，十年前第一集收視爆燈，第二集卻被指曲高和寡，悶場多睇唔明，一度跌穿無綫慣性收視只得 20點，女主角鄧萃雯大爆飛紙仔情況嚴重，加上壓力爆煲患上抑鬱症，更跟其他演員罵戰連場。
《神探高倫布》
視帝黎耀祥坐鎮，但玩穿越時空又要視帝扮傻，唔啱師奶觀眾胃口，平均收視得廿幾點，更多次被要求腰斬；有指當時拍攝的導演及主要幕後員工過檔王維基，令監製李添勝要親自剪片及做後期，搞到一鑊粥。
《怒火街頭 2》
11年《怒火街頭》一出即爆，收視 38點，主角鄭嘉穎爆紅，胡杏兒攞視后，但《怒火 2》口碑收視聲勢均下滑。
