探熱針
大陸咇 走音唱東莞夜場 楊思琦勝在爛做
單親媽咪楊思琦去年初誕下女兒楊卓穎後，因大話妹形象插水，即使樂易玲幫手救亡，也只偶然撈散 job，搵濕碎錢。
養女養家又要供樓，楊思琦於是轉走大陸夜場咇，搵奶粉錢為本下，餓男黐身黐勢、擦老細鞋全部當食菜，乜都得小姐上身的她，現時每星期起碼跑三個夜場，加埋商演活動，月入六位數字，夠撐！
長做長有
三十四歲楊思琦，大話連篇未婚產女仲要甩埋拖，自負盈虧跌 watt變大茄，但產後復出年多以來都無劇拍，只可在《 May姐有請》、《千奇百趣》及《獎門人》等節目亮相，新劇《廉政行動 2014》終於有份做其中一個單元，可以執多四千蚊濕碎錢。
養女養阿媽仲要供樓，楊思琦每逢出席活動也會積極呼籲自己要搵錢𢱑job做，可惜香港有限數，開發財路靠跑內地線，自己知自己事的她，乜都接之餘，對老闆亦有求必應。好使好用的大原則下，令原本夜場登台價只有五萬的她，現已升價至七、八萬，而且長做長有。
酒吧連續一星期慶祝開業一周年，請來馬德鐘及方力申等輪流演出，當中以黎耀祥廿多萬酬勞最貴，其次是十多萬的馬德鐘，楊思琦也有八萬。 
走音出局上月中參加《星夢傳奇》獻唱一曲《我願意》走晒音，一唱即叮出局。（《蘋果日報》圖片） 
話之你楊思琦演出，有酒客玩得投入，但有些卻說：「有咩咁大不了？明星仔之嘛！」佢有佢唱，自己有自己玩。
嗲聲嗲氣
上星期一（九月九日），楊思琦應內地一大型夜店 MG-Club邀請到東莞出席開業一周年慶祝活動，與會港星還有黎耀祥、馬德鐘、方力申等，一人一晚輪住唱。
上月中在《星夢傳奇》以王菲一曲《我願意》參賽的楊思琦，雖然第一唱已走音被叮出局，卻未有打擊她在內地唱歌娛賓的信心。
「思琦出到場嗲聲嗲氣，又識搞氣氛，對老闆要求全面配合，唔會麻煩多多，所以好多老細都鍾意用佢。今次做大場錢多啲，但就算要收平嘅細場佢都照接。」一位內地中介人說。
擦老細 
特登提早一小時到場，在休息室與兩位老闆合照，還有一大班親朋戚友排住隊等「輪影」。 
任人抽水搵奶粉錢緊要，楊思琦試過在內地登台被酒客攬膊抽水，一樣硬食。 
派簽名握手，有求必應的楊思琦毫不擔心被扯落台。
挑戰王菲
慳住使養女養家的楊思琦經常幫襯茶餐廳，買平嘢，生活慳住慳住。
演出當晚，楊思琦在夜場黃金時間凌晨一時後出場，演出前的例牌工夫包括在休息室跟老細的親朋戚友「輪影」，其間有國內電視台想做訪問，卻被無綫經理人所拒，連為夜店錄祝福語也不 OK，楊思琦唔想得失金主，做好做醜答應解圍。
正式演出時，一口氣唱了《大日子》、《心花怒放》、《月亮代表我的心》等五首歌的楊思琦還挑戰難度，選唱王菲的《人間》，唔夠氣走晒音無問題，最緊要識冧客，在台上不停指住觀眾讚靚仔，呼籲大家多啲幫襯，又唔怕俾人扯落台伸手同台下酒客握手，唱足四十五分鐘，有求必應。
賣盡口乖，八萬落袋！上週六（十四日），楊思琦又轉到成都出席成都蘭桂坊嘉年華活動，之前也曾與郭晉安、黎耀祥及徐子珊等到雲頂賭場演出，不停站跑騷，成功開拓米路。
