山 P首集剝衫戲水，收視高開 17.4%。第 2集，山 P轉移陣地，玩半裸上床，可惜收視跌到得 12.8%，最近播第 3集仲跌去 10.8%，真係驚要剝晒先救亡到！
日面
激戰 3女神 山 P賣肌救亡
多得防腐福山雅治，食老本拍的《神探伽俐略 2》令日劇起死回生，緊接而上的夏季日劇更 keep住個勢，繼續大勇。
今季日劇，除 90年代日劇天后江角真紀子出山再戰江湖外，還有實力偶像上戶彩加入戰團，不過㗎妹同港女至愛，始終係大隻又靚仔的山下智久（山 P）。
剛剛於日本富士電視台播映，由山 P孭飛的「月九」新劇《 Summer Nude》，找來名模香里奈再加人氣偶像戶田惠梨香及長澤正美，女神帥哥大激戰，暗戀苦戀多角戀乜都齊。最激係山 P好似劇名一樣由頭「 nude」到尾，不過播咗 3集，收視由高開 17.4%變插水，唔通山 P要剝清先救亡到？
去年萬人迷山下智久曾拍住 AKB一姐前田敦子合演日劇《人生最好的終結方式》，雖然兩大偶像合作令人期待，可惜因敦子演技差令收視跌到 9.1%，山 P更無辜被封為「收視毒藥」。今年山 P再度出戰，演出暑假新劇《 Summer Nude》，電視台專程搵咗 3個日劇福將香里奈、戶田惠梨香及長澤正美撐住山 P，實行三星伴月搶收視。
全裸潛水
山 P除擔演男主角，仲唱埋主題曲〈 Summer Nude'13〉。 MV中山 P賣大包玩裸泳，露出屁股潛水，入行以來最激呢次！
半裸上床
劇名叫《 Summer Nude》，男主角山下智久亦好識得配合主題，剝衫玩水兼半裸床戲，都騷出 40吋巨胸，肯定冧死女觀眾。
考水上電單車牌
《 Summer Nude》聽個名以為情慾片，查實套劇係講山下智久扮演人氣攝影師朝日，於女友（長澤正美飾）失蹤 3年後，遇上香里奈飾演的中女夏希，以及由戶田惠梨香飾演的中學師妹波奈江， 3人在海邊的民宿發展一段錯綜複雜的三角戀。
以夏日為題，劇中當然唔少得男主角山 P剝衫晒肌場面，據知山 P為以最佳狀態示人，開拍前一個月狂做 gym操 fit自己，還專程考埋水上電單車牌，一於唔衰得。
女主角不和
劇中，香里奈跟戶田惠梨香一齊爭山 P，其實私底下 2人亦傳出不和。據知曾同木村拍過日劇《 Priceless》的香里奈，因自覺已升呢成一級女星，而且認為戶田的 level跟她差幾級，但竟可一齊做女主角，因此有指二人等埋位時冇偈傾不特止，香里奈更經常黑面。不過最近香里奈接受訪問時，就扮晒 friend話：「點會不和啫？我同惠梨香都曾攞我哋不和嘅新聞開玩笑，我覺得好有趣。」假咗啲喎！
師妹暗戀
山 P未能忘懷失蹤女友長澤正美；又與香里奈有段曖昧感情。原來背後，仲有一個中學師妹波奈江（戶田惠梨香飾），一直暗戀山 P，展開一段苦戀。
女友失蹤
6年前山 P同長澤正美合演《求婚大作戰》大受歡迎。今次喺《 Summer Nude》再演情侶，可惜正美今次只係配角，劇情仲講佢無故失蹤，令山 P無法忘懷。
玩姊弟戀
劇中 29歲名模香里奈飾演中女夏希，原本叠埋心水嫁人，點知結婚當日，新郎臨門一腳逃婚。慘變棄婦嘅香里奈到海邊小鎮散心時遇上 28歲山 P，之後仲發生一段姊弟戀。
面左左
香里奈（右）口話冇同戶田惠梨香不和，但月頭《 Summer Nude》開宣傳記招時，香里奈就黑口黑面，而惠梨香更擰歪面，完全冇交流。
熱門與黑馬
春季日劇靠 44歲福山雅治演《神探伽俐略 2》出手救市。夏季日劇本應打算搵 46歲日劇天后江角真紀子出山打救日劇，點知被黑馬上戶彩跑贏。
《庶務二課 2013》江角有頭威
由江角真紀子出山主演的《庶務二課 2013》已於 7月 10日首播，首集錄得 18.3%收視，原本好勁，點知去到第 3集已跌到得 9.9%，救唔到市，要諗計自救喎！
由江角真紀子孭飛的《庶務二課》，首輯早於 98年開播，之後拍到第 3輯，但 03年拍埋特集之後便停產。事隔 10年，為打救日劇市場， 46歲真紀子再度出山，拍新一輯《庶務二課 2013》，今集於庶務課做打雜的真紀子，再度帶住班姊妹對付無良上司，為打工仔出番啖氣。
《半澤直樹》揭金融醜惡
堺雅人飾演於金融界打滾嘅半澤直樹，而上戶彩就扮演堺雅人老婆，做成功男士背後嘅女人。
由實力偶像上戶彩搭堺雅人主演的新劇《半澤直樹》，講於泡沫時期加入銀行做職員的半澤直樹，與銀行內外敵人戰鬥的故事，當中揭開不少金融界鬥爭及醜惡事，戲味超濃。此劇於 7月 7日開播，首集高收 19.4%，至今播到第 3集更升到 24.4%，暫時成為今季黑馬劇王。
撰文：何家文
