新車激試
平開型格篷 A3 Cabriolet 1.4 TFSI
Ads by Google
開篷車對一般香港人嚟講，從來都好似好遙遠，車價貴、唔實用又大食……數唔到咁多理由令人唔去考慮。不過今年 Audi引入嘅入門開篷車 A3 Cabriolet 1.4 TFSI就唔同，比 A5 Cabriolet平 14萬已經買到相近嘅高級型格外形，四座位設計車廂空間亦合理，每公里油費仲唔使 8毫子，唔係空間狂嘅話， 3、 4人小家庭真係可以當代步車用，一家人揸去白泥開住篷睇日落，係你揸 MPV一世都感受唔到嘅，代價都只係 40萬有找！
車身比房車版短 35mm、窄 3mm、低 7mm，都唔算好細部，而且加咗電篷系統都只係重咗 35kg。
中價經濟篷
唔計 MINI、 Fiat 500同 smart呢啲微型車，其實大部分開篷車都要 50萬以上，好似 Audi A3 Cabriolet 1.4 TFSI咁 40萬以下嘅，就同集團 VW最多，但品牌同外形當然有距離。
經典再生 VW Beetle Cabriolet 1.4 TSI
一樣用 1.4公升引擎嘅開篷車有推出到第二代嘅 New Beetle，外形夠經典，而且引擎用到 twin-charge技術， 1.4公升都有 160匹，只賣$359,880。
開頂辣跑 VW Golf GTI Cabriolet
相近嘅$398,800價錢，亦可以買到 A3 Cabriolet同集團嘅兄弟車 Golf Cabriolet，而且係用 210匹 2.0公升 turbo引擎嘅 GTI辣版！不過就係以上代 Golf為基礎嘅款式，最新 7代 Golf Cabriolet仲未到港。
形象高級夠架勢
試車當日陽光普照
有成 30度，喺車內摸落篷頂
唔會辣手，冷氣亦唔覺唔夠凍。
中控台設計同設備同其他版本一樣， 5.8吋 mon.、 MMI系統、軚盤遙控等一應俱全。 
7速 S Tronic波箱冇變，但反應似乎比其他版本快少少。 
仍然有 4個駕駛模式嘅 Audi Driving Select系統，可以自行設定波箱同軚盤反應。
買跑車最怕得兩隻門都唔夠有型，特別係開篷車形象如果冇番咁上下高級，揸出街分分鐘畀人笑你窮鬼扮公子。不過揸 Audi你就唔使擔心，一來品牌高科技同潮流形象已經深入民心；二來全個車系都係用家族式設計，就算係入門級嘅 A3 Cabriolet，車頭車尾都同 A5 Cabriolet似足 9成！
而且今代 A3 Cabriolet車身比例再唔係好似上代咁以揭背車為基礎，閂埋篷時係優雅嘅 Coupe格局。事實上佢亦只係比四門房車版短 35mm，並唔算太細部，唔會畀人揸縮水車嘅感覺。而且車身冇 A5 Cabriolet拉到咁長，車形更 young、更 sporty，揸出街話佢賣 50萬以上都肯定有人信！
三層結構嘅軟篷用咗鎂、鋁同高拉力剛造支架，安全性充足，可以安全收藏喺尾箱內，車身仲加咗 Audi開篷車招牌嘅金屬框裝飾。 
車尾造型同房車版差唔多，都有明顯凸出嘅尾箱位，亦有鴨尾設計。
耗油最低更爽快
開篷版隔音
當然唔及房車版，但感覺上只係嘈過
揭背版約 15%，而且噪音
集中喺車尾。
後座唔會太痛苦
現行第 3代 A3已經推出 3年，先後推出過五門揭背同四門房車版，今次嘅開篷版車廂都唔會有乜新意，前座嘅設計同設備基本上冇變，不過開篷版當然會畀到啲唔同嘅感受你。首先冇門框設計已經瀟灑啲，而且 A3 Cabriolet車側冇 B柱之外，後座車窗亦都可以全開，就算唔開篷，開晒窗都有型過一般硬頂 Coupe。
至於最重要嘅開篷部分， A3 Cabriolet一如所有 Audi開篷車都係用電動軟篷， 50km/h車速以下 18秒就可以開或關，隔熱同隔音能力同其他軟篷車冇乜分別。而成日逃避親朋戚友坐順風車嘅車主，最關心嘅後座空間方面，就可謂喜出望外。雖然軸距比房車版縮短咗 42mm，但只要前座唔好移得太後，校到腳位啱啱好，其實後座腳位都唔會太迫，最厲害係閂篷後後座都唔會頂頭！坐足 4個 5尺 9吋嘅男人都唔會頂頭夾腳，空間已經非常合理。如果啲仔女仲細，買嚟玩幾年肯定全家都開心過坐 MPV，等仔大女大唔夠坐時先換部 MPV都未遲啦！
開篷掣設於電子手掣左邊，但要㩒實先可以完成開或關篷過程。 
除前後車窗都可開關外，特設一按全開或全關車窗掣，對開篷車嚟講極之方便。 
前座款式同其他版本相同，但用料係更跑車化嘅半真皮配半 Alcantara皮，仍有電動腰部承托。
雙座位後座剪裁冇變，但椅背角度直咗啲，好在 5尺 9吋身形坐都唔頂頭，亦未到夾腳程度。 
320L尾箱容量只係比揭背版少 60L，但開篷時要拉下頂部隔板就變到得 275L。 
難得開篷車尾箱都可以摺合後座放長形物件，而且兩側仲有摺合掣。
125匹 1.4公升 turbo引擎大咗 3匹，但仍然有停車熄匙同空波滑行功能， 5.1L/100km耗油同房車版相同。
數據上， A3 Cabriolet 1.4 TFSI比揭背版同房車版分別重 65kg同 35kg， 10.2秒 0-100km/h時間亦慢咗 0.9秒，但試車感覺就剛好相反！如果細心留意吓，就會發覺 A3 Cabriolet 1.4 TFSI嘅 125匹 1.4公升 turbo引擎，係比其他 1.4 TSI版本多咗 3匹嘅。雖然喺數字上微不足道，但加速感明顯爽啲，加速反應更敏銳，有理由相信廠方喺引擎同波箱上有微調過，令開篷版感覺更 sporty！加上開篷後嘅快感，就算實際速度可能慢咗，但感覺絕對比其實版本快得多！而且耗油量同房車版一樣都係 5.1L/100km，以現時油價計油費只需$0.76/km，成為同級最慳油開篷車！
另外，雖然 A3 Cabriolet冇咗個硬頂，不過一般行駛唔會發覺車架剛性弱咗，只係喺非常高速唔踩 brake飛入彎心嘅一瞬間，軚感會模糊咗少少，但仍然可以提供充足穩定性，而且點劈都唔會出現雜聲。需知道 A3 Cabriolet 1.4 TFSI之上仲有 300匹嘅頂級 S3 Cabriolet，完全唔使懷疑佢嘅車身剛性。
A3 Cabriolet 1.4 TFSI spec.
引擎： 1,395c.c.直四 turbo
馬力： 125hp/5,000-6,000rpm
扭力： 20.4kgm/1,400-4,000rpm
傳動： 7速雙離合器自動波、附+/-模式
車身： 4,421 x 1,793 x 1,409（ mm）
車重： 1,365kg
0-100km/h： 10.2秒
耗油： 5.1L/100km
售價：$399,900
查詢： Audi HK(3465 0000）
撰文：陳致新
攝影：葉偉豪
