面對面
人生交叉點 Dear Jane
捱足十年二打六，突然遇到千年難逢的《星夢奇緣》，一夜翻身，從二打六一躍龍門變台慶夜開場歌星……
鄭俊弘的轉運之路可謂電視圈近代最激動人心的勵志故事，不過我在想，既然愛唱歌，十年前為甚麼要選擇做二打六？
條路其實有得揀，重點在於那一刻你點揀。
差一點點， Dear Jane主音 Tim就可能是今天的鄭俊弘：十年前放在眼前有兩條路，第一，與無綫簽份經理人長約，除了保住本有的《翡翠音樂幹線》和明珠台主持，亦有人承諾兩套新劇預埋佢，十年後你可能是陳豪、亦可能是鄭俊弘，當然更大機會是繼續做二打六……
結果 Tim的選擇是第二條路，與 Jackal、 Howie和 Nice組成樂隊 Dear Jane，那一年，他 22歲：「年輕就係咁，不知好歹， passion大於一切！」
今年， Dear Jane成立十周年，出過五張專輯、擁有四隻電台榜冠軍歌、 YouTube點擊最高的作品是 250萬的〈到此為止〉、新歌〈不許你注定一人〉剛推出已經點擊百萬、 iTunes單曲銷情長踞榜首贏過天王天后，最有趣的是，我發現 Dear Jane的歌大家都識唱兩嘴，成員知名度卻極低，鼓手 Nice的微博粉絲僅僅六百，還少過成名前的鄭俊弘……這一刻，我想不到有甚麼詞，比「紅歌不紅人」更能恭維一隊樂團，更能證明，這十年的路，他們走得一點不寃枉。
Brotherhood
連詩雅首本名曲〈到此為止〉 YouTube點擊 580萬， Dear Jane男聲翻唱版亦不弱，至今點擊超過 250萬。
結他 翁厚樑 Howie 35歲
Howie在美國出世、美國長大，是年紀最大（ 35歲）、話最多、亦對樂隊最有歸屬感的一個。他不止一次把與 Dear Jane的關係形容成一場驚天動地的戀愛、甚至一段海枯石爛的婚姻、 10年將前鼓手 Adam踢出局形容成撕心裂肺的分手、把觀眾的擁護形容成一次激昂壯闊的高潮……明明直筆甩的大男人，來到 Dear Jane就變得基情四射，我諗這就是音樂的魅力、 brotherhood的威力。
YouTube
最新單曲〈不許你注定一人〉有口皆碑，短短一個月在 YouTube點擊過百萬，被視為年尾頒獎禮金曲大熱， Dear Jane四子說最自豪「紅歌唔紅人。」
鼓手 黎俊華 Nice 26歲
三年前， Dear Jane與本來的鼓手 Adam鬧不和， Adam離隊，造就 Jackal的打鼓學生 Nice加入替補成為新成員。客串幫拖加考慮足足一年後， Nice才決定放棄本來已經進修了三年的會計專科，半路出家做歌手。作為新血， Nice亦是最熱血的一個，念念不忘的，是要完成一個父母沒能完成的搖滾夢。
Dear Jane做 band行咗好多寃枉路，我就係做人行咗好多寃枉路。中學以後，我喺香港讀咗兩年會計、再喺澳洲留學一年，成三年時間，我一路讀書、一路考慮：其實第時夾 band好、定穩穩陣陣打份工好？ 01年我業餘幫 Dear Jane打鼓，諗極都唔識揀，諗到 Jackal都頂唔順，成日打嚟問我：「諗掂未呀？係時候決定喇？」我爹哋揸貨櫃車，喺我小學已經交通意外過咗身，媽咪一個人做保險養大我同細佬，唔同人哋，我係屋企長子、責任心特別重，一直想養起媽咪、想媽咪為我自豪。爹哋過身咁多年，我剩番嘅回憶已經唔多，但係我特別記得佢鍾意同我一齊打機、同媽咪一樣鍾意 band sound，細細個就喺屋企日日播。最終，我選擇咗玩音樂，而唔係做會計，媽咪唔嬲反而以我為榮。因為佢同爹哋都鍾意搖滾音樂，佢骨子裏有股浪漫主義，佢同爹哋熱愛而做唔到嘅嘢，今日由我去完成。媽咪成日都話要嚟睇我做騷，我係都唔畀佢嚟，叫佢上網聽 YouTube先，我信有朝一日 Dear Jane會去到一個位、做一場大騷，我要等最墟冚嘅一次，先至叫媽咪嚟現場感受，一次過，叫佢等 Dear Jane最盛大一次！
Anniversary
夾 band難搵食是常識，所以 Tim為歌手做監製、 Jackal開音樂學校、 Nice亦兼職教打鼓幫補生計。
低音結他 伍漢邦 Jackal 33歲
Jackal最拿手的其實是鼓，不過現時在樂隊卻負責低音結他崗位。他擁有英國聖三一音樂學院爵士鼓八級證書、在日本進修過敲擊樂、自家擁有兩間分校的音樂學校、亦在周杰倫和張震嶽的音樂會上做過鼓手，明明打鼓可以獨當一面，他卻能為了 Dear Jane放下鼓棍彈起低音結他，又是為了男人的浪漫。
我係屋企獨仔， Dear Jane對我嚟講就係兄弟、大於一切。我失戀嘅時候，係佢哋幾個陪我度過，我屋企有事，係佢哋幫我打點等我專心處理家事，所以當隊 band需要我，打鼓又好、彈 bass都好，在所不辭。我老豆揸的士、媽咪係家庭主婦，十幾歲開始，我就係靠自己做 part time，喺咖啡店打工， 30蚊時薪一蚊一蚊儲起學樂器、買樂器。考試、留學，全靠自己半工讀，冇靠過屋企一毫子。咁叫叻？咁就叫生性咩？原來唔係……三年前，媽咪個腦驗到有事，我至恍然大悟：係喎，原來咁多年我做得咁辛苦，都係為自己、從來冇為過屋企、從來冇盡過一個仔嘅責任。媽咪得我一個仔，佢有咩事，我點算？嗰年，我叫 Dear Jane班兄弟頂住先：我要養家啦，我大個仔喇，於是嗰兩年我特別勤力特別慳，每分每毫都儲起佢，一心想儲夠錢幫媽咪醫病。好彩，媽咪最終冇事，而嚿錢我用佢完成咗我一個心願，同朋友夾份喺般咸道開咗間音樂學校教打鼓。今年係 Dear Jane十周年，對我嚟講特別有意義，我哋嘅歌開始愈嚟愈多人聽到、我嘅學生一日比一日多、我完成咗開學校嘅夢想，而同時間亦都安排媽咪幫我喺學校打點返工，同父母開始有另一個層次嘅聯繫、終於負起一個仔應有嘅責任…… 33歲，終於可以話，我大個仔喇！
Passion
03年成立的 Dear Jane，負責低音結他的本來是歌唱名師 Christine Samson之子 Adam（左二）， 10年 Adam與三子決裂離開樂隊。
主音 黃天翱 Tim32 歲
11歲移民美國、 22歲回流香港加入無綫， Tim是 Dear Jane外形最優勝的一個、口齒最伶俐的一個、父母從商家庭環境最優越的一個、姑丈是杜琪峯後台最硬的一個、同港姐楊洛婷拍拖七年，亦是成員中女朋友最好身材的一個……冇錯，我唔講，原來 Tim的背景、出身、感情狀況竟然冇乜人知，因為十年來他堅守的只有一個身份，「 Dear Jane主音」。
中學畢業，大學選擇主修音樂，父母曾經提出質疑：「係唔係可以揀第二科呢？興趣係唔係真係可以當飯食呢？」； 22歲放棄無綫嘅 management合約走去夾 band，父母同親戚亦都勸我諗清諗楚：「呢個賭注會唔會太大？經理人合約會唔會穩陣得多？」……我好慶幸，佢哋只係建議，從來冇左右過我嘅選擇，我嘅路最終都係交畀我自己行。我冇諗過十年前如果我選擇無綫份經理人合約，今日自己會係陳豪定鄭俊弘，但係我有諗過，呢十年若果自己唔係攞咗嚟夾 Dear Jane，一定會後悔。十年前嘅我，唔同十年後嘅我，我唔敢講今時今日、同樣既選擇，我會點揀，但係我好慶幸每個人都後生過、我都後生過。年輕，可能不知好歹、不知天高地厚、唔知點樣撞少啲板行少啲寃枉路，因為 passion大於一切。回望十年前，我感激自己年輕過、任性過，最終揀咗夾 band呢條路。你知唔知，望番轉頭，每條寃枉路，都一啲唔寃枉，由當初上台，觀眾唔係離開、就係剩番啲懶得行嘅阿婆、細路，坐喺原位但係揞住耳仔，到我哋𠵱家上台，全場跟住一齊唱……呢一下，無價，行再多寃枉路，都值得！
可以去到幾盡？
為咗搖滾，你可以去到幾盡？
Dear Jane四子其實都試過被挑機，去唔得咁盡。
話說 03年出道簽約漢傳媒， 06年經理人自殺、公司易主、老闆變咗王晶，一向賣低俗的王晶，其實沒有想過放棄 Dear Jane，只提議他們改樂隊名、改花名：「佢話樂隊成員最緊要俾人叫得出名，叫我哋幾個改名， Howie係燒賣、 Jackal係鳳爪、 Tim唔記得叫咩包……我哋實在過唔到自己嗰關，於是被公司告毀約、用咗一年時間打官司、又借又『西』籌番嚟成十萬律師費。」
難以想像，一隊 band變咗粥粉麵飯、藍莓春卷之流，亦說不定，王晶獨具慧眼，燒賣鳳爪可能真的會大行其道，就像十年前鄭俊弘不會知道自己有今日，路一定要自己走，才能看見出口。
十年前從美國回流， Tim曾經是《翡翠音樂幹線》主持；亦做過電視劇《下一站彩虹》大茄：「如果我唔係解咗約，十年後可能係鄭俊弘。」 
第一次與楊洛婷見面是 03年港姐活動，二人撻着卻是 Tim離開無綫後的一次活動後台：「我嘅生活一部分屬於 Dear Jane、一部分屬於女朋友，少咗邊個都唔完整。」 
撰文：朱小博
攝影：范仲良
髮型： Janie@Hair
化妝： German Cheung
形象： Bryan@the Flaming
服裝： Musium by I.T、 Koyo Jeans
