Fred拍拖受無綫施壓，但 30歲生日，兩人也不理太多，低調外出撐枱腳慶祝。
探熱針
姜麗文陪過夜 賀鄭俊弘足三張
鄭俊弘（ Fred）憑《星夢傳奇》人氣急彈攞埋冠軍，無綫食住個勢宣布成立「星夢娛樂有限公司」力捧「星夢幫」，雖然要加簽十年經理人長約，但 Fred為圓歌星夢賣身亦在所不計。
十一月十日 30歲生日的 Fred，牛一前夕（九日）先跟歌迷、家人及朋友慶祝，正日就留俾女友姜麗文，兩個拍拖鋸扒歎紅酒，然後孖住返女友位於沙田的香閨過夜，二人世界。
圓終極夢想
在《星夢傳奇》奪冠後人氣急升的 Fred身價暴漲，成為不少商場騷及廣告商的搶手貨，已跟無綫簽下十年死約的他，將於本月十五日舉行記者會，正式宣布簽約「星夢娛樂有限公司」旗下，明年推出個人唱片，圓歌星夢想。
「 Fred而家啲工作的確係排山倒海咁嚟，除咗要繼續拍劇，仲有好多商場 event做，聖誕節同元旦已經排好晒工作，啲 plan傾到去情人節檔，都幾誇張㗎。雖然忙，但佢好開心，因為等咗咁多年都係等呢一日，所以就算無綫要佢簽十年，佢只係諗咗一陣就簽，做歌手係佢終極夢想。」 Fred身邊人說。
撐完枱腳後， Fred與姜麗文齊齊打的返回女友於沙田的寓所，過夜繼續慶祝。 
Fred對女友很體貼，落車除了為她開門外，還幫女友拿手袋，是位細心的男友。
拍拖有壓力
事業運急轉，相對拍拖時間將愈來愈少，與姜麗文一起兩年的他，近三個月同女友聚少離多，只能靠電話維繫感情。
「 Lesley（姜麗文）都知道 Fred好忙，多咗好多嘢做，加上無綫之前俾過壓力要 Fred低調戀情，冇辦法啦，食得鹹魚抵得渴！」
前途要緊，唯有見少幾面，但講到生日大日子，例外！
每次提起 Fred，姜麗文也會笑得很甜，畢竟二人拍拖兩年，大家共同經歷過不少，男友如今吐氣揚眉，做女友的開心不已。 
苦等多年， Fred終於憑參加《星夢傳奇》而得到無綫垂青，將力捧他成新歌手，圓了歌星夢。 
Fred與女友慶祝正日，而生日前夕則安排與近百歌迷聚會兼成立歌迷會，與眾同樂。
鋸扒歎紅酒
剛踏入三十歲的 Fred，生日前夕（九日）與過百歌迷聚會，同時成立歌迷會，陪完 fans，再與家人、朋友食飯慶祝，雖然壽星仔事先張揚生日正日想好好休息，其實佳人有約。
本週日（十日），姜麗文下午出席完「新城勁爆頒獎禮 2013記者會」後，返回位於沙田寓所稍作休息，接近晚上七時，才換過另一套衫出動往尖東尖沙咀中心，會合比她早到的 Fred，齊齊到樓上的美國餐廳 Ruths Chris，鋸扒歎紅酒撐枱腳。
生日飯，女友主動埋單請客。離開時，兩人在商場內保持一定距離，行到商場門口， Fred與女友截的士一同返沙田，留在姜麗文香閨過夜。
姜麗文與 Fred拍拖食飯，也會盡量保持距離。 
在未奪得《星夢傳奇》冠軍前， Fred已被拍下陪女友姜麗文及其爸爸秦沛下午茶的照片，可見他們關係非淺。 
撰文、攝影：娛樂組
