■電鍍鬼面罩、頭燈及霧燈組重新設計過，賣相更年輕。
想曬太陽又怕突然落陣失魂雨變落湯雞？唔怕，自從遇上新一代 STEPWGN，我每日都瞓喺私人大床曬太陽，再唔係就從大天幕欣賞雨景。有全天候八人車，落雨，又有乜好怕喎！
記者：李鑒泉
攝影：陳盛臣
模特兒： Cherrie Tam@M.Spy Model
■如果翻平中後排座椅，可讓兩人舒舒服服地曬太陽。
上大天幕下大尾廂
儘管驕陽似火，但仍有唔少人想與陽光玩遊戲，結果石澳、清水灣等停車場未及正午已告爆滿，未曬太陽座駕都曬到「水滾」，而且近排香港似足東南亞，時晴時雨搞到勁狼狽。幸好本田引入新一代 STEPWGN，前中排或中後排座椅都可摺合隱藏，變成一張大床！躺在天幕下曬陽光，既唔使同人逼，又唔怕搞到一身沙，冲身都慳番，惟要留意巨型車窗外會唔會有人「偷」。變大床之餘，中後排也能獨立收起，尾排更可完全收藏在地台中，騰出大量空間擺放單車或行李篋。作為廠方大碼 MPV， STEPWGN後座座墊較厚，承托力足，及受惠於高車身低地台，廠方更加入上代沒有的中央頭枕，進一步提升乘坐享受，要八個人舒舒服服去海灘都無難度。
1.天幕從車頭伸延到中排，堪稱同級最大。
2.尾排可收藏在地台下，開合方便。
3.摺起中後排後，尾廂足以容納爬山單車。
■ Econ Mode綠葉外光圈，會因應油耗而變色。
跑味包圍裝備升呢
本田亦有照顧駕駛者，除暗格甚多的中控台及駕駛席旁邊的茶几外，連+/-撥片軚環、支援 USB及藍牙播放的 Kenwood機頭、車側廣角鏡及 Smart Key免匙啟動等均討駕駛者歡心，不得不提紫光包圍的圓形錶板，中央樹葉標記外側光環會因應耗油量而從白色轉為綠色，從而知道自己的慳油表現，貼心的還包括開關電趟門的按鈕，開門就更方便。但要分辨新舊兩款 STEPWGN還是要從外觀入手，新車車頭的電鍍鬼面罩向下伸延至霧燈位置，頭尾燈亦換上更煞食的光條式設計，加上 SPADA包圍、尾翼及17吋多輻式輪圈（上代為16吋），跑味瞬間提升，一啲都唔娘！
■支援藍牙、 USB的 Kenwood機頭有板有眼。
■尾翼造型誇張。
■左側廣角鏡方便監察左前側路面情況。
■內櫳佈局簡潔，但設有多個暗格，方便收納雜物。
油耗每公里約$1.2
取得環保車資格的 STEPWGN，配備一副兩公升直四 i-VTEC引擎，能輸出150匹馬力，聽落好似小兒科，但本田加入七前速 CVT自動波箱連+/-，行車轉數徘徊1,200至1,300轉，且使用 Idle Stop停車熄匙系統後，廠方公佈油耗為14km/L，每公里約$1.2，以 MPV而言算慳油。另外廠方用雙重避震彈簧以減低車身震動，還有一系列如 HSA斜坡起動輔助、 VSA車身穩定系統及改良的 i-SRS安全氣袋等，兼顧行車舒適及安全。以33萬元車價能買到一部有齊大天幕、雙電趟門、跑味包圍的環保八人車，今個暑假仲唔立即載晒親戚朋友周圍玩、周圍曬！
STEPWGN SPADA
引擎：1,997cc直四 i-VTEC
馬力：150PS/6,200rpm
扭力：19.7kg-m/4,200rpm
傳動：七前速 CVT連+/-，前輪驅動
售價：$329,880（已扣環保稅）
查詢：28278622（合群汽車
