有性訴
左派性經 梁梓禧
一般人日常生活慣用右手，因此，從不知何時開始，「左手」就被喻為小眾，亦與同性戀扯上關係。
今年四十有一，原名梁奕倫的梁梓禧，人到中年，包袱愈來愈輕，索性豁出去高呼自己是左派。大愛同行，梁梓禧的性愛經驗的確比「一般人」多，醉酒失身、 gym club獵食到一夜情統統試過。「性經驗真係數唔到喎！唔通我每次搞完，再畫一個正字俾自己咩！」
無數次翻雲覆雨後，換來的只有快感，沒有質感。
梁梓禧最終希望可以找到一個能夠長相廝守的牀上高手，「有一個穩定嘅伴侶好緊要，我係一個好需要愛情嘅人。」
本地同志界神級人物張國榮金曲〈左右手〉，有一句歌詞：「從那天起我戀上我左手，從那天起我討厭我右手。」有人要花大半生時間，才能摸清自己鍾意行左定行右，但梁梓禧就從未試過花上半秒，探討自己屬於那條路。
Born to be gay
梁梓禧與茜利妹早前出書大爆廣播界內幕，當中梁亦有提及 22歲時失身俾一名廣播界前輩。
離不開青葱歲月校園發春夢這條方程式。「 13、 14歲時讀男校，初頭我諗係咪成間學校冇女同學，所以先會鍾意或者暗戀啲男同學呢？但去到暑假參加校外興趣班，就 feel到自己唔鍾意𥄫女，反而會留意啲男同學。到中四時，有個轉校嘅男仔好得，咪借啲意同佢傾偈，又搵佢一齊做功課，可以日對夜對，當時就知道自己一定鍾意男仔！」
既然揀好攣路，梁梓禧亦一路曲線走下去，堅拒扮直迎合大眾。「我唔會花時間去 find out矛盾，有啲朋友叫我不如試下（與女性拍拖）。我唔會因為『可能我得』就去試下，我知道咁樣會傷害女仔。我唔會嘗試亦唔會 buy所謂拗直療程，根本冇可能拗番直，好多餘！以我認知嘅同性戀者，九成都係天生嘅。有好多人根本係攣，但為咗同屋企人交代，咪夾硬搵個女人結婚生仔。但過咗好多年之後，等啲仔女長大咪最終同個老婆講『其實我攣㗎！我依家要溝仔喇！』」
醉酒失身
梁梓禧與茜利妹為節目《攣直後援會》訪問口技了得的吹神拓也哥。
梁梓禧從無迷失性向，試過讀書上堂時與身旁的男同學隔着衫互相愛撫，又試過用林珊珊的錄音帶盒，摩擦下體自製興奮。「我試過用林珊珊《癡心》大碟做封面嘅 cassette帶盒，開合開合咁刺激我嘅『小倫』。可能我做錯動作，過程唔算愉快……林珊珊……我對你唔住！」
自我訓練功力深厚，但還是到 22歲才第一次真正同人落場比試。「哈哈……嗰次齋失身冇拍拖嘅，佢係我未入行前已經好仰慕嘅前輩，入行先認識佢。我喺創作上問佢好多意見，有一次我去佢屋企飲大咗， feel到有啲唔對路，反正都冇（試過），不如試下啦，咁就順理成章。我醉咗但都有知覺，正所謂酒醉三分醒。 22歲先……係咪太遲呀？」
時間並非問題，最緊要是失身得甘心。「嗰時我都 feel到佢想有下文（拍拖），但我好明確，我咪同佢講：『我對你嗰種仰慕唔係鍾意，我唔想呃你！』所以冇開始到。（之後有冇再打友誼波？）冇喎！」
到處獵食
這次醉酒失身令梁梓禧開始從基界出道，之後他拍過多次散拖，但次次壽命短得可憐。沒有愛情寄託下，他只好找尋放縱出口，但礙於 DJ身份，於是他惟有暗地裏在同志網發布徵友廣告。「嗰時我做緊好傳統嘅港台，擔心俾人影到去基吧會有影響。我冇機會認識同性，又唔蒲，有啲免費雜誌最尾嗰欄有 man seek man（同志徵友廣告）， 90年代打一個電話去留低 call機號碼，大家 match得埋，嗰個人就會覆番你。（撻唔撻得着？）撻唔到，齋搞嘢！哈哈……佢係醫科學生，讀醫幾吸引呀……嗰時好刺激，佢叫我去佢宿舍過夜。十幾年之後，我喺一個電台節目訪問啲義務工作者，嗰條友上咗嚟俾我訪問喎，我又唔尷尬，嗰場戲大家交得幾足。」
之後他試過流連健身室，靜雞雞尋開心，愈玩愈大膽。「 90年代，我貪慕虛榮 join君悅酒店個 private club。有一次做 gym撞到個鬼佬，有眼神接觸。佢做飛機師，傾咗幾次佢就邀請你上房，同佢都兩、三個月，嗰時唔算認真，只係年少好奇，似去獵奇多啲。（中國人同老外有咩唔同？）我鍾意中國人多啲。可能我英文唔好啦！你好 high時又唔知點講，或者你整親對方又唔知點講。我覺得拍拖或者性伴侶，最緊要溝通到。（鬼佬係咪犀利啲？）我唔覺得 big size代表犀利，最重要係心靈上有交流，令對方達至一次……情緒高漲位。」
現時終於有穩定伴侶的梁梓禧，對同性愛侃侃而談，但家人始終是他最大的心理關口。「我擔心屋企人唔接受，我一路以嚟都冇帶過女仔返屋企，我諗住佢哋係默認。早前節目《攣直後援會》有活動，記者講咗出嚟。直至報紙出咗街，我家姐傳訊息問我『係幾時嘅事？你開心就得啦……』，唔提就唔好提，老人家有佢哋嘅方法去消化，我覺得我老竇知囉！」
Gay英文意思是開心，開心就得啦！
雖然不好女色，但由於工作關係，梁梓禧少不免要與女演員有身體接觸，試過在舞台劇《偷窺》與 Jeana有情慾戲。 
梁梓禧與林珊珊（紅圈示）的關係千絲萬縷，二人曾在 BMA唱片公司做過同事外，林珊珊的一盒錄音帶，竟成為了梁發育期恩物。 
梁梓禧至今未有就性向與家人告白，他說：「明哥（黃耀明）當年同屋企人講自己係攣時，佢屋企人都好無奈。」 
採訪、撰文：林碧洋
攝影：袁家樂
影片：盧芷斌
協力：李梓軒、蔡政峰
形象： Bryan@the Flaming
服裝： indu homme
